"90 دقيقة كورة"
يا عم الله يخربيت الكورة .
و اي حد معترض
أحب اقولك : "انتا تافه" .
خلاص البلد فاقت
و الناس راقت
و الشوارع نضفت
و الفقير لقى يسد جوعه
و البلطجة لم تعد في مجتمعنا
و الجهل قل و كلنا اتعلمنا
و الطبقية بقت طبقة اشتراكية
و أنا مش اشتراكي عشان ما تخدهاش حجة و تقول ياعم ده اشتراكي و تفكيره عقيم و غلط و بيمثل علينا و مكبر الموضوع .
* و بعدين لما تسيب شغلك و تكلم في هجمة في مطش مع زميلك يبقى انتا تافه ؟!
* لأن في مشاكل كتير
ممكن تجري على حلها
و تباصي لواحد تاني يحل معاك
و تجيب جون يفرح قلب حد
يقوم دعيلك و يبقى ده خط الدفاع
بدل ما احنا شعب واقف كوبري .
عزيزي : #يوسف_الحسيني
السلام عليكم
و بعد؛؛؛
بوجه عنايتك ان الصلاة من الله رحمة للعالمين و وحدة للمسلمين و لا ترهب احد غير من يخشي وحدة المسلمين .
و صلاة المدرسة كلها في ملعب الكورة و ليس الزاوية ده بسبب عدم امكانية احتواء الزاوية لهذا العدد لان المسلمين اللي في المدرسة كان عددهم كبير اكتر من عدد فريق البرنامج عندك اللي ممكن يصلي في الزاوية .
ثانيا هل تعلم ؟
أن رسول الله صلى الله عليه وسلم قال "جعلت لى الارض مسجدا وترابها طهورا"
وقال :كل عمل يلهى عن الصلاة فهو ابتر ... اى مقطوع البركة .
و قال تعالى "إن الصلاة كانت على المؤمنين كتابا موقوتا"
باختصار ياعزيزي : التربية زمان كانت مقتصره علي الدين المتمثل في القرآن و السنة مش كتب وزارة التربية و التعليم اللي دمرت أجيال و خليتنا لسا دولة نامية وضعها زي الزفت و بيوجها ناس عقولها فاسدة .
يعني لو خايف علي طلاب مصر لازم تخاف من مناهج التربية اللي انتا نشأت عليها مش من تلبية نداء الله للصلاة اللي انتا مش ملاحظ اهمية اولويتها علي التعليم المنهجي الرتيب .
و مش عايزك تعتقد للحظة اني بقول عليك انك كافر لانك فعلا مش كده انت فقط جاهل في هذا الامر ياعزيزي لذلك انصحك بدراسة تعاليم الدين و الانتقال للمقارنة بتعاليم الوزارة ستجد ان ما يهدر الحصص و عقول الطلاب فساد التربية المجتمعية و ليست التربية الدينية .
و كنت هاتعرف انك طالع تتكلم و انتا ماعندكش معلومة دينية او دنيوية عن الموضوع .
المدرسة حاطه ده في الجدول اليومي و ما بيقطعوش من الحصص للصلاة .
و فكرة ان صاحبه اخواني فا انا عايز اقولك ان صحابها بعد بحث و تفحص علمت انه من اشد #المؤيدين_للسيسي و من الحاضرين لكل فعالياته .
و ليس كل اللي مصلي إخوان و ليس كل اللي ما بيصلوش #إخوان .
و السلام امانة للي عندك .
خاطرة بعنوان
"مصر بدون طرحه"
هاكتبلك كل الحكاية يمكن تفهمي الكلمة ..
يامستقبل و حلم بلا معنى ..
و ماضي غير وارد في احداثه غير الوصف ... باللعنة
و دونك ... كل ايامي السعيدة دي لوحدها قصة ما تفهميهاش .
هابسطهالك ...
فاكرة حزنك في شد حبيبك الحالي للطرحة
و ضربك وملامحه كلها فرحة .
بحجم الحزن ده في حياتك .... كانت عندي الحياة بعيد عنك الفرحة .
فهمتي المعني ياوردة دبلانة من قبل ما تفتح .
فهمتي انا ليه غمضت عيني عنك و مش مفتح ؟
لان الحب عندك كان رغبه في حبيب ...
كل كلامه معسول .
و الفعل فيه من زمن للاسف ...
كتابه لسا مش مقفول .
اما انا فالحب عندي ... فعل يتكتب في زمن مالهوش كتاب .
في حكاية غلبك الظاهر في الزحمة ...
و لحظة امل في الستر و الرحمة .
*فايترحميني و #تعلي_صوتك_في_الزحمة ....
ياتستني في مكانك ساكته و ضحكته تملا المكان فرحة .
وننسى حزنك و #ننسى_شده_للطرحه .
"فتى بناء"
الإمارات افضل دولة فى الشرق ... ناس عارفه مصلحتها و بتساعد اى حد .... بس بتساعد فى حالة وجود مصلحة بتعود عليها فى رخاء شعبها و بتدوس على اللى ممكن يعيق زيادة الرخاء و ممكن تدمر اى دولة و لو عربية .
بس ده فى رآى غرض نبيل لو حتى كانوا هايدمروا العالم العربى .
ده كان ردى على كل اللي بيقول ان الامارات بتنفذ خطة الصهاينة و بتساعد الامريكان و كل قادتها عملاء و اللى بيقول الكلام ده مش قادر يعترف ان شعبها اكتر شعب مستقر فى المنطقة العربية و بيمتلكوا التقدم فى كل مجالتهم .
و من هنا ادعوا الجميع الى قبول الحقيقة الممررة على حياة و صحة و سعادة جميع العرب ما عدا الامارات طبعا .
و قبول فكرة ان البناء اللى حصل فى الامارات ما كانش بدايته عندهم كلام تخوين عن كل الدول المتقدمة بس كان حلم و كلهم شاركوا بعض نفس الحلم و اللى بيقول انه شعب متخلف و غبى اكيد التخلف و الغباء ده مش واضح غير عندنا فى الاسلوب و الشغل و الدمار الاقتصادى و الغباء السياسي و الحمورية و العنجهية و السلبية و الانطوائية و اى مواصفات نيلية اخراها "ي.ة" يمكنك ضمها و ما اكثرها .
و فى النهاية اطرح عليكم سؤال من خيالى :
ما المانع لوكان ثمن العيش الكريم لشعوب العرب تحقيق بعض ما يرغب به الاعداء عشان نوصل زى الاخواة الاماراتييييين ؟
إفتى .... أنا سامعك .
نقلب حالنا امتى يا شعب ؟
رغم ان الحال ما يسرش
و الفينخة ما بتخرش
لسا بتقول ما يضرش
امتى تفوق و ترد الحال ... في الحال .
و تبقى العيشة رخاء و جمال
هي اللحظة لسا ما جاتش ؟
امتي ياشعب تقول ما تخفش ؟
يعني يا شعب ياخدوا اللحظة
و انتا تموت و تقل في لحظة .
نقلب حالنا امتى يا شعب ؟
هي الكلمة لما اتسرقت
ليه الشعب ما اقالش الكلمة ؟
هوا الحق كلمة تقيلة ؟
طيب خوفك عيشة جميلة ؟
انسى الجبن و انسى الخوف
عمر الخوف ما خلي جميل .
أنت الشعب و هما الكلب بيقرف منهم .
حابس كلمة وساكت ليه
و سايب كلمة كلب يعض كلام .
قول الكلمة و اضحك ضحكة تشوف الدنيا بتضحك ليك .
انزل اطلع روح و تعالى حالك واقف طول ما الحال خايف منهم .
امتى نقلب حالنا يا شعب ؟
قولي صحيح
فاهم كلمة حال مقلوب
طيب اسمع
ترمي الخوف . تضحك . تضحك . تعيش اللحظة بمعني اللحظة .تطلب حقك . تصاحب صاحبك ما تبعهوش . انتا و هوا وحوش الحال
انتو الشعب في ايد كاملة ارمي الحزب و ارمي الكنبة . جهز كلمة حق تقولها . اطلع انزل . روح وتعالى . علم صاحبك يبقى معانا .. عرف صاحبك يقلب حالا ..
بس خلاص .... حال الدنيا ... اجمل حال ... طول ما الحال بيهم مقلوب .
نقلب حالنا امتى يا شعب ؟
"و نعيد الحسبة من تاني"
كتب : #أحمد_فريد
سيداتي سادتي
الحقيقة أن مصر ... "في خيالي" .
عبارة عن قصر .
شعبها دوره .... يحرسها و يبنيها .
و الملك ... اسم بيختلف من عصر لعصر .
إنما لو هنعلق أحلامنا و أيامنا و خطاوينا
على واحد ..... فا الواحد ده قاصر لو مفرد من جمع الشعب .
فثواني نتوقف عن حسبة مش كاملة .. و نعيد الحسبة من تاني
فتخيل مثلا لو شعب ...رجالة و ستات اتجمعو مع كل ولاد و بنات الشعب .
و طرحنا خلافنا و قسمتنا من كل الحسبة المتعادة .
و الملك ... كان في الحسبة.
مضروب x أمر الشعب .
مطروح من العظمة و الصورة الحلوة و نفاق الناس المؤذية و الرشوة و الحزبية .
فساعتها ياسادة .... الحسبة هتساوي= ... القصر ملك الشعب .
و سؤالي ياجمع الليلة ياشعب مصر و يا سادة
كام مرة بيزيد الهم ؟....و يقل الجمع في المرة كام واحد ؟....
.و ليه قل ؟ .... أنا حاسس اننا هانقل كمان و بكره هانبطل نتلم .
طب ممكن تحسبها معايا .
كام مرة ضحكة امبارح ؟و كام ضحكة قلة في اليوم ؟...... مش محسوب منها الصفرا إلى بتملا كل مواقف اليوم ؟
فثواني نتوقف عن حسبة .... مش كاملة .
و نعيد الحسبة من تاني .
. استعيذوا من الشيطان .
ده القلب في كلمة و ضحكة بيحب
و الجرح بينزف و يلم
الود لو صافي ...ّ العمر بينكم يتمد
و الحب لو صافي الكره بينكم و بينه 100 الف سد .
دي نصيحتي ليكم قبل ما نبدأ كلام .
ها قولولى ... الخلاف بينكم ايه ؟ مش ده الى انتوا جينلي فيه
ايه ! .. كرهتيه .... ليه؟ .
طيب اسمعي
هاقولك غلطك انتي فين .
غلطتي لما سكتي على ظن منك مش كلام
و سبتي فكرة تكبر هي اصلا كابوس في المنام .
طب عارفه ان الكابوس ده شيطان في المنام
غار من حبكم و وسوس في ودنك الهجر حل تمام .
و نساكي ضحكة ملت حياتكم شوق و عشق عدي عليه أزمان
و انتي اخترتي الزمن إلى الشيطان فيه بان .
استعيذي من الشيطااان ..
و افتكري ضحكتك من القلب و افتكري لحظات الأمان .
افتكري الذكريات الحلوة و افتكري الكلام بينكم و البعد لما يسافر
و الشوق لما يعافر
و القرب
و يبوح بكلمة حنان قلبه ... كشفها في قلبك .
و الفرحة غطت قلبك ...
فاكره .. لما كنتي بتشكي ليه همك
و طبطبته على كف ايدك و يقولك
ما تخافيش... أنا جنبك و حضنه الي كان بيطمنك و يضمك
التغير جوه منك ... انتي
و الأنوثة اترمت علي الارض
خلتيها مجرد مشوار بالطول أو بالعرض
و دفنتي المشاعر في أعمق عمق في الأرض
خليتي سكوته عنك نقطة غلط و جدال
و هوا خايف يشيلك اد إلى شيلتيه .. جبال .
و أنتا ساكت ليه
في الشغل دفتر حضورك ديما متأخر ومدير بيزعق و يشخ..مر
ما قولتلوش ليه انك في بعدها مش عارف تنام .. و أن هي الشمس و البدر في الاحلام
اشمعنا قولتلي انك في يومك
قاعد و السما لونها ملوش وجود
اسود سواده بلا حدود .
لحظة وجودها هي الوجود
مش ده كلامك بردو
أستعيذ من الشيطان
و خد حبيبتك و قلها كلام جميل
ده حتى شعرك انتا احلا من كلامي الثقيل
اقولك عشيها في النيل
وروح و اتفق معاه على كل شيء جميل
احكيلها حبك و غنى ليها الحكاية و كررها كل شوية و اعملها مواويل ... هما يا سيدي بيحبوا الكلام الجميل ايوه ديه النصيحة حسسها بيك هاتحب كل دقيقة ... بيك و هاتخلي عمرها عمر زيادة ليك .
و انتي قومي روحي و ما تجوش غير على العزا او بحفيدي الجميل .
خاطرة بعنوان : #استعيذوا_من_الشيطان
تأليف : #أحمد_فريد
#Ahmed_Fareed
وفي لحظة لفت نظري .
كتب : #أحمد_فريد
إنها دول متعددة بلغات مختلفة اجتمعوا و رغم الاختلاف واصلوا التعاون و التفاهم و ترسيخ مبادئ ليتوحدوا في جبهة سميت بالاتحاد الأوروبي تنبذ دولنا و تعمل على بقائها تحت مسمى النامية و تحرز تحقيق التقدم المستمر لشعوبها و هو حق مشروع لتلك الدول .
أما نحن .... فنحن دول عربية و لغتنا عربية واحدة و لم نتوحد يوما إلا لنتحدث بكل مصطلحات التقدم دون أن نفعلها في جبهة واحدة
بل ننهي الحديث الدرامي و نفترق لنعود إلى مخادعنا و في احضان الخيال نتخيل حديثنا المقبل .
و بعد أن التفت نظري إلى تلك الحقيقة ؛ استطعت اقتطاع الشك إلى اليقين بأننا دولً عربية اللغة من الماضي إلى المستقبل و بلا مستقبل .
. محوا أول خطوات البناء .
فى لحظة ضبابية توارد الى خاطري سؤال رحت معه افكر عن اجابة يستنبطها عقلى .
لماذا مصر تخشي التقدم لماذا لا تقبل ان تتساوى الرؤس فى الحقوق و الفروض
كيف لا يسمع الكبير صغيرا .
الإجابة : فى ثورة الخامس و العشرين من يناير 2011م عندما تظاهر الفقراء والمظلومين كانوا يصرخون متفقين للظلم ان يسقط فسقط .... و لكن أبطال الثورة لم يؤمنوا بحق العيش الكريم للجميع و فضلوا الطبقية على المساواة .... فبقت الطبقية و محوا اول خطوات البناء و ما زالت اللحظة ضبابية .
"كيف تحل الازمة ؟"
كتب : #أحمد_فريد
"في وحي التفكير خيل اليّ ان القانون كان لهم هبة من الله في مهد طفولتهم"
فالقضاة لم يكن التعليم أكثر منهم علما لذلك كرمتهم الدولة برغد العيش .
فحصلوا على أجور لا تلبس ان تزيد لتزداد مرة آخري كذلك الامتيازات في تكاثر .
حتى كان ما حدث و أعلنت الحكومة أن خزانة الدولة المالية في تدني و لديها أزمة في تغطية الأجور .
و كان الحل لأزمتهم :
* أن يدني من أجور #أساتذة_الجامعات .
فليس #المعلم بأهم من #القاضي
* و أن يدعو في الصلوات ان يهب الله لهم كل الأطفال في المهد متعلمين حتى تبنى الأمة و يتقدم الوطن .
و في النهاية عليك ان تعلم أيها القارئ : ان حديثي من وحي تفكيري هو من وحي حديث حكومتنا فلا يلومن أحدُ علي .
فعندما كنت في وحي الخيال افكر .
كيف يكون الحل ؟
صور الىّ انه من الممكن ان يكون قرار الحكومة بأن يحصل القضاة على نصف راتبهم بشكل مؤقت حتى تمر الأزمة بسلام ؛ كما فعلها #حماة_الوطن من قبل .
فاجور القضاة المكلفة للخزانة هي الأعلى و ليس #أساتذة_الجامعات
فكما خيل ليّ الوحي :
ان العلماء هم الأهم فلم يولد القاضي قاضيً و انما أراد له معلما .
. دوشة .
في وسط زحمة الشارع الصبح و بليل
و صوت الناس و ضحك مش رايق أدام مطعم زحمة ولاد و بنات
و خناقة افندي مع تاكسي عطل الشارع .
و شارع غرقان بدم ... و كانها حملة الصليبين و اجتاحت بلاد المسلمين
و عيال بتشوط من على الأرض الدم و بتطرطش على العربيات إلى اصحابها بيغسلوها كل عيد مرة ....
و ثقافة نظف وراك مش معروفة و عيب كده يا ولد مش مسموعة غير في العزومات الديقة .
وناس طالعة من الصلاة بتاخد سيلفي بطيخ ... و فراولة و توت ورمان و قارفينا على الفيس .
شكرا أيها السادة مش بس هاقفل البلكونة و أبطل تركيز في مناظركم انتو فصلتوني تفكير .
و العيد كان فاصل انام فيه عشان ارتاح من كل التفاصيل ديه و اراجع حساباتي و من ضمنها فقرة البلكونة ملغية و الفيس مغلق للتنضيف .
الافورة بقت في كل مكان .... الدوشة مش فرحة ....
النظام في العيد في دول تانية فرحة أحسن من كده بكتير ....ّّّ* يامافورين يا بتوع المدارس .
ملحوظة * ليكن في اعتبارك ماحدش شاف إلى أنا شوفته بره البلد زمان و بره البلكونة من شوية ...
الموضوع كله : العيد كان عند ناس فاصل من الدوشة بس و عندي فاصلة من الدوشة .
" هدوء مؤقت "
على شاطئ البحر
في مشهد يصف أسلوب الحياة في ذلك الكون .
في تصارع الامواج و قطرات ماء نافرة من ذلك الصراع الي بر الشاطئ
كما الإنسان "ينفر من عواصف الحياة و صراعات البشر إلى شاطئ البحر"
باحثاً عن الهدوء ...
ملقيا بهمه إلى تلك الأمواج "دائمة الصراع" ؛ بدون أن تنفر .
فقط هي قطرات الماء التي تنفر من تلك الأمواج فتصيب كل الهاربين على ذلك الشاطئ .
"الهاربين من أحزان تلك الحياة"
و حين تلامس قطرات البحر النافرة اجسادهم
تشعرهم بانتعاش لا يدوم طويلا ؛
سرعان ما تجف تلك القطرات و تبقى ما حملته من املاح لتشعل النار فى جسدك .
فتستيقظ من تفكير عميق يسرق دقائق الحياة المملة .
و حينها تود أن تبحث .
عن قائل تلك الكلمات الواصفة : "رش المياه عداوة"
الحقيقة ..... أنني لم ابحث عنه هوية ذلك الشخص........ لكنني امعنت التفكير في كلمات ذلك الحكيم العاقل .
و غير أنني متأكد من انه كان الحكيم و كان أعقل العقلأ حتي يصل الي تلك الكلمات غير العابرة ....
اعتقد انه تعلم القول من هجوم عليه في عدة عواصف قاسية متتالية ؛ محملة بكل ما لا تشتهيه نفسه .
فحاول أن يبحث عن الهدوء .... فايقظه تصارع الأمواج و قطرات ماء متناثرة على جسده أشعلت لهيب نار انستهُ قطراتٍ أخرى متنافرة تناثرة حوله علي رمال الشاطئ فحملت له طيب الهواء .
حتى ان الحكيم لم يكن قوله وافيا حد الوصف متلهفا عودته الى العاصفة .
فسرعان ما أطلق صوتً سمعه كل الكون و انتقدته البشرية .
انتقدته لانها لم تذكر إلا ذلك الانتعاش في ذلك الكون حتى أنا لم أكف عن انتقاده .
فنحن نبحث عن العاصفة إذا لم نجد إلا الهدوء .
و دائما نختلف في الرئي
و الاختلاف في الرئي في رأيي دائما ما يفسد سلوك الآدمية لدى كل البشر .
فنحن لا نستمع و أيضا لا نفكر جيدا قبل الحكم على أية قضية بل نبحث عن العاصفة .
لذلك تكون الحياة مملة
تدعونا كلنا إلى الهرب لنوجد هدوء لا يستمر طويلا .